வாரணம் ஆயிரம்

'வாரணம் ஆயிரம் பார்க்க சூர்யாவும் வரான்'னு தெரிந்தவுடன், (வீட்டின்) தானயத் தலைவி, 'வாரணம் ஆயிரம் போலாமா?'னு கேட்க, வேண்டாம்னு சொன்னாலும் கேக்க போறதில்ல.

தியேட்டரில் ஏகப்பட்ட கூட்டம். 'என்னைப்போல'  மனைவிக்காக சூர்யாவை பார்க்க வந்தவர்கள் ரொம்ப பேர் போல..!

'ஜோ' மிஸ்ஸிங்!

படத்தோட தலைப்பு (மட்டும்தான்) தமிழ்! மத்தபடி, படத்தில வர தமிழ் வசனங்கள் கம்மி தான்!

வழக்கம்போல படம் வெளிவந்த இரண்டு மணி நேரத்திலலேயே  வலைப்பூவில், இணையத்தில்,  டிவிட்டரில்னு படத்தை நம்ம மக்கள் அலசி ஆராய்ச்சிட்டாங்க! என் பங்குக்கு ஒரு 10 டாலர்.........இல்ல 2 சென்ட்!

வழக்கமா தமிழ் சினிமாக்குன்னு இருக்குற பார்முலாதான்!
கல்லூரி கலாட்டா...
ஒரு பாட்டிலயே  வீட்டை கட்டி, கதாநாயகன் பெரிய ஆளாகிறது...
காதலிய தேடி கிளம்புறது ...

இப்படி ஒரு பட்டியல் போடலாம். ரெண்டு வாரத்துக்கு முன்னாடிதான் சுதா ரகுநாதன் கச்சேரிக்கு போக, இதுல அட்டகாசமான ஒரு பாட்டு!!

'ஆஹா....சூப்பர்!!'னு சொல்ல தோணவில்லை என்றாலும் படத்தை ஒரு முறை பார்க்கலாம்.

சில நேரங்களில், படத்தைவிட (சில) விமர்சனங்கள் அருமையாக இருக்கு!
உதாரணத்திற்கு:

"சாத்தான்"குளத்து வேதம்
தனிமையின் இசை
ஜெஸிலாவின் கிறுக்கல்கள்
செப்புப்பட்டயம்


பி.கு; விகடன் ப்ளாக்குல பார்த்துதான் விமர்சனம் எழுதுறாங்களானு சந்தேகமா இருக்கு. மார்க்கு மட்டும் பரிசு குடுக்காம பேசாம வாசகர்களுக்குகிட்டேயே விமர்சனம் எழுத சொல்லி பரிசு அறிவிக்கலாம்.'விமர்சன குழு'  எழுதுறதை விட சிறப்பாவே இருக்கும்!

நவம்பர் 21, 2008

சினிமா

1. எந்த வயதில் சினிமா பார்க்க ஆரம்பித்தீர்கள்? நினைவுதெரிந்து கண்ட முதல் சினிமா? என்ன உணர்ந்தீர்கள்?

1957ல் (10வயதில்) பாட்டியுடன் பார்த்த கல்யாண பரிசு என்று நினைவு. A. நாகேஷ்வரராவ் மேல் கோபமும், ஜெமினி - சரோஜா தேவி மேல் அனுதாபமும் ஏற்பட்டது.

2. கடைசியாக அரங்கில் அமர்ந்து பார்த்த தமிழ் சினிமா?

தசாவதாரம் (அமெரிக்காவில் பார்த்த முதல் படமும் கூட)

3. கடைசியாக அரங்கிலன்றிப் பார்த்த தமிழ் சினிமா எது, எங்கே, என்ன உணர்ந்தீர்கள்?

குசேலன் -- குப்பை!

4. மிகவும் தாக்கிய தமிழ் சினிமா?

ஒண்ணா..ரெண்டா..

பாசமலர் - அண்ணன் தங்கை பாசம்

கை கொடுத்த தெய்வம் - நட்பு

மகாநதி - தந்தை மகள் பாசம்

5-அ. உங்களை மிகவும் தாக்கிய தமிழ் சினிமா-அரசியல் சம்பவம்?

அப்படி ஏதுவும் நினைவில்லை...

6. தமிழ் சினிமா பற்றி வாசிப்பதுண்டா?

பொம்மை, பேசும் படத்திலிருந்து எல்லா பத்திரிக்கைகளும்

7.தமிழ் சினிமா இசை?

இப்ப வர படங்கள மெலோடியஸ் இல்லை... 'கர்ணா'வில் வரும் மலரே மவுனமா..    நல்லா இருக்கும்.

மிகவும் இரசிப்பது பழைய படங்களின் இசை ... உதாராணத்திற்கு தீர்க்க சுமாங்கலி, அபூர்வ ராகங்கள்... இப்படி ஒரு பெரிய பட்டியலே இருக்கு.

 8. தமிழ் தவிர வேறு இந்திய, உலக மொழி சினிமா பார்ப்பதுண்டா? அதிகம் தாக்கிய படங்கள்?

உலக சினிமா பார்க்கும் வாய்ப்பு கிடைக்கவில்லை!

இந்தியில் ஆராதனா

தெலுங்கில் சங்கராபரணம்

9. தமிழ்ச்சினிமா உலகுடன் நேரடித்தொடர்பு உண்டா? என்ன செய்தீர்கள்? பிடித்ததா? அதை மீண்டும் செய்வீர்களா? தமிழ்ச்சினிமா மேம்பட அது உதவுமா?

ஒருத்தரையும் தெரியாது.

10. தமிழ்ச்சினிமாவின் எதிர்காலம் பற்றி என்ன நினைக்கிறீர்கள்?

Technical side நல்லா இருக்கும்

11. அடுத்த ஓராண்டு தமிழில் சினிமா கிடையாது, மற்றும் சினிமா பற்றிய சமாச்சாரங்கள், செய்திகள் எதுவுமே பத்திரிகைகள், தொலைக்காட்சி, இணையம் உள்ளிட்ட ஊடகங்களில் கிடையாது என்று வைத்துக்கொள்வோம்? உங்களுக்கு எப்படியிருக்கும்? தமிழர்களுக்கு என்ன ஆகும் என்று நினைக்கிறீர்கள்?

கண்டிப்பாக கவலைபடமாட்டேன். தமிழர்களுக்கு ஒன்றும் ஆகாது.

~~~~~~~~
ஒரு மாறுதலுக்கு, இந்த கேள்விகளை அப்பாவிடம் கேட்டால் என்ன என்று தோன்றியதன் விளைவு!

அப்பா - 38 வருட வங்கி வேலைக்குப் பின் இப்பொழுதான் ஓய்வு பெற்றிருக்கிறார்கள்.  'எங்கள் கல்விக்காக' பதவி உயர்வு வேண்டாம் என்று சொன்னவர்.

எம்ஜியார், சிவாஜி, எம்.ஆர்.ராதாவின் பயங்கர இரசிகர். 'பகவத்கீதையும், பைபிளும் மூலம் கற்றுக்கொண்டதைவிட எம்ஜியார், சிவாஜி படங்கள் மூலம் கற்றுக்கொண்டது அதிகம்' என்று அடிக்கடி சொல்லுவார். பழைய படங்களிலிருந்து ஒரு பாட்டோ, வசனமோ சொன்னால் அது வெளியான வருடம், நடிகர் - நடிகைகள், இசை, வசனம், ஒளிப்பதிவு, இயக்குநர் என்று 'தகவல்கள்' வந்து கொட்டும்!

அப்பா படம் பார்த்துவிட்டு வந்து கதை சொன்னால், அந்த படத்தை பார்க்க தேவையில்லை. அப்படியே காட்சி பை காட்சியாக, கேமரா ஆங்கிள் முதற்கொண்டு விளக்குவார். உதாரணத்திற்கு நினைவிற்கு வருவது 'நிறம் மாறாத பூக்கள்' !

'தில்லானா மோகனாம்பாள்' படம் எத்தனை முறை பார்த்திருப்பார் என்று அப்பாவுக்கே தெரியாது.
எத்தனை முறை 'பாசமலர்' பார்த்தாலும், பக்கத்தில் துண்டு தேவை. படம் முடியும் பொழுது கண்கள் சிவந்து போயிருக்கும்.
இதைவைத்து நாங்கள் கேலி செய்யாத நாளே இல்லை!!

ஆனால், சில படங்களை அப்பாவுடன் சேர்ந்துதான் பார்க்கவேண்டும்! அது ஒரு சுகமான அனுபவம்!!

சினிமா: தமிழ், ஸ்பானிஷ் மற்றும் சில

Volver (to return) -- ஒரு திகில் படத்துக்கான எல்லா சாத்தியகூறுகள் இருந்தும் ....... இந்தப் படம் வேறொரு தடத்தில் பயணிக்கிறது.

வாழ்க்கையின் (பெண்களுக்கான) சில கொடுமைகளையும் அவலங்களையும் கடந்து .... ஆண்கள் இல்லாத 'உலகில்' அவர்களால் தங்களுக்கென்று விருப்பமான ஒரு வாழ்க்கையை வாழமுடியும் என்பதை பதிவு செய்கின்றது.

கொலை, பாலியல் வன்முறைகள்.... என்று கதைகளம் பின்னப்பட்டாலும் கதாபாத்திரங்களில் அதிர்ச்சியோ அல்லது கதை முழுவதும் சோகமோ இல்லாமல் இருப்பது படத்தின் சிறப்பு. வாழ்க்கையில் சில நிகழ்வுகள் நம்மையும் மீறி நடக்கும் பொழுது அதன்வழி சென்று தங்களுடைய இயல்பில் வாழும் கதாபாத்திரங்கள் படத்தின் மற்றொரு சிறப்பு. அதையே பார்ப்பவர்களுக்கும் உணர்த்துவது ... ம்ம்ம்.... அதுதான் இயக்குநரின் வெற்றி [Pedro Almodóvar] !

@

ஒன்பது ரூபாய் நோட்டு -- நாவலை படித்துவிட்டு படம் பார்ப்பதில்தான் எவ்வளவு வேறுபாடு. படிக்கும்பொழுதே சத்தியராஜ்ம், அர்ச்சனாவும் வந்துவிட்டு போவது தவிர்க்கமுடியவில்லை.

நாவலைவிட பல விடயங்களை படத்தில் அழகாகவும், யதார்த்தமாகவும் அதே சமயத்தில் அழுத்தமாகவும் சொன்னதற்கு தங்கர்பச்சானுக்கு வாழ்த்துக்கள். நமது கலாச்சாரம், மண்ணின் மணம் , அந்த மண்ணின் வாழும் மனிதர்களின் இயல்பான வாழ்க்கை முறை என படத்தில் இரசிப்பதற்கு பல விடயங்கள்......

இந்தப் படத்தின் நீதி .... வறட்டு கவுரம், பிடிவாதம் இதலாம் விட்டுக் கொடுக்காம இருக்கணும் என்பதா? அல்லது அதலாம் இருந்தா இதுதான் நிலமை.... அப்படினு எடுத்துகிறதா.... என்பது போன்ற கேள்விகள் எல்லாம் படம் பார்ப்பவர்களைப் பொறுத்து......

இதையெல்லாம் மீறி...... மாதவர் படையாட்சி போல் ஒருவரை பற்றி கேள்விப்பட்டு இருக்கலாம் அல்லது நம் வாழ்க்கையில் கடந்து வந்து இருக்கலாம். கிராமங்களுக்கு சென்றால் மாதவரைப்போல நம்மிடையே சிலருண்டு..... அப்படி ஒரு பதிவாகதான் இதை பார்க்கமுடிகிறது.

கதாபாத்திரங்களை சரியாக தேர்வு செய்தாலே படத்தின் பாதி வெற்றி என்பது போல கதாபாத்திரங்களின் தேர்வு கச்சிதம். அர்ச்சனா சில இடங்களில் கத்தல் அதிகமாக இருந்தாலும், சத்தியராஜ்க்கு சரியான போட்டி.

சத்தியராஜ்க்கு இந்த வருடம் தேசிய விருது கிடைக்கும் வாய்ப்பு அதிகம்!!

பல வருடங்களுக்கு முன் எழுதின நாவலை படத்திற்காக சிலதை மாத்தி இருக்கிறார் (நாசர் - ரோகினி காட்சிகள்...).

தங்கரின் பேட்டி (தமிழன், பிட்சா...) என்று சில வெறுப்பேற்றினாலும்..... இது மாதிரி படைப்புக்காக அதையெல்லாம் மறந்துடலாம்!

@

அஞ்சாதே -- டைட்டில் போடும் பொழுது படத்திற்குப் பின் இருக்கும் கலைஞர்களை முதலில் போட்டுவிட்டு நடிகர்/ நடிகைகள் பெயர்கள் கடைசியாக வரும் பொழுது ....... 'அட' !!

படத்தின் முதல் காட்சியில் 'காமிரா விளையாடும் விதம்' இது கொஞ்சம் வித்தியாசமதான் இருக்கும்போல என்ற எண்ணம் அதிகமாகிறது.

ஒரு 'தமிழ் படத்திற்கு' தேவையான எல்லா குணாம்சங்களும் இருக்கும் கதைகளம்தான். திகில் படமாகவும் எடுத்திருக்கலாம்.

இரண்டு கதாநாயகர்கள் - நரேன் & அஜ்மல், கதாநாயகி (விஜயலட்சுமி), வில்லன் [ ப்ரசன்னா (!) ], காமெடி [ பாண்டியராஜன் & குருவி கதாபாத்திரம்], குணசித்திரம் [பொன்வண்ணன்], டூயட், குத்துப்பாட்டு .... இதுவெல்லாம் இருந்தும், கதையை நாம் எதிர்பார்க்காத.... முற்றிலும் வேறொரு கோணத்தில் நகர்கிறது. கொஞ்சம் பிசகினாலும் கதை தவறாக புரிந்து கொள்ளப்படும் அபாயம் இருப்பினும் மிக நேர்த்தியாக ..... கதாபாத்திரங்களை நம்மில் படறவிடுவது... அதுவும் யாரும் எதிர்பார்க்காத கதாபாத்திரங்களில்..... ம்ம்ம்...இயக்குநருக்கு பாராட்டுகள்!

காவல் துறையில் சேரும் ஆரம்ப நாட்கள், அந்த பாட்டி, ஒளிஓவியம் குறிப்பாக..... மங்கலான அந்த வெளிச்சத்தில் கால்களை மட்டுமே காட்டும் காமிரா (திரையரங்குகளில் இதற்கு எப்படியான response இருந்தது என்று தெரியவில்லை..), இசை..... என்று படத்தில் ஏகப்பட்ட சமாச்சராங்கள்....

ஓரிரு பாடல்களை தவிர்த்திருந்தால் நன்றாக இருந்திருக்கும்.

மகேந்திரன், பாலுமகேந்திரா, பாரதிராஜா, கமல், (காணமால் போன) அகத்தியன், சேரன், அமீர், மிஷ்கின் ............. என்று தமிழ் சினிமாவில் இப்படி பட்டியல் பெரிதாக வேண்டும்!!?

உண்மைதமிழன் இந்த படத்திற்கு பதிவு எழுதினதாக நினைவில்லை... அப்படி அவர் எழுதும் பட்சத்தில் ஒரு 50 பக்கம் குறுநாவல் உறுதி... !! ;) அவ்வளவு விசயம் இருக்கு இந்தப்படத்தில்.......

@

'ஆஸ்கர்' வெளிச்சதிற்கு பிறகே பார்க்க வேண்டும் என்று தோன்றிய படங்கள் -- No Country For Old Men & Juno !

No Country For Old Men - க்ரைம் த்ரில்லர். சைக்கோ கதாபாத்திரம். கோயன் சகோதரர்களின் வேறந்த படங்களும் பார்த்ததில்லை. படத்தில் பாதி காட்சிகளுக்கு மேல் இசையில்லை.

'The Silence Of the Lambs' ல் Anthony Hopkins பார்த்து மிரண்டு போனது (படம் பார்த்த பின்பும்..) ஒருவகையான சைக்கோ. இந்தப் படத்தில் வருவது மற்றொரு வகை. முற்றிலும் வித்தியாசமானது. படத்தில் திடீர் திருப்பங்கள் என்று எதுவும் இல்லாமல் ஆனால் பார்ப்பவங்களுக்கு ஒரு திகிலை உண்டாக்குகிறது.

இறுதி காட்சி என்றால் அடிதடி, சண்டை அல்லது 'வீர' வசனங்கள் என்றே பழக்கப்பட்ட நமக்கு ....காவல்துறை அதிகாரி (பெல்) தன் மனைவியிடம் அவருடைய கனவைப்பற்றி சொல்லும் இறுதி வசனங்கள்...... படத்திற்கே ஒரு அழுத்ததை குடுப்பதாகவே தோணுகிறது. [இரண்டு மூன்று முறை இறுதி காட்சியைப் பார்த்த பிறகுதான் புரிந்தது என்பது என்னுடைய தனி கதை !! ]

Juno - ரொம்ப எதிர்பார்ப்புகளுடன் பார்த்த படம் என்பதால் ஏமாற்றம். இவர்களுடைய வாழ்க்கை முறைகளை கொஞ்சம் தெரிந்து கொண்டு பார்த்தால் படம் பிடிக்கலாம். இல்லையென்றால் தூக்கம் வருவதை தவிர்க்க முடியாது. படத்தில் எனக்கு பிடித்தது... அந்த இறுதி காட்சி பாடலுடன்!!

@@

தமிழ்

பிறமொழி இலக்கியம், எழுத்தின் ரகசியம், இளம் எழுத்தாளர்களின் படைப்புகள் பற்றிய எழுத்தாளர் எஸ்.ராமகிருஷ்ணன் அவர்களின் பதிவைப் படித்த பொழுது ஒரு பெருமூச்சு மட்டுமே பதில். அவர் குறிப்பிட்ட 50 மொழிபெயர்ப்பு புத்தகங்களில் ஒன்றோ இரண்டோதான் கேள்விப்பட்டவை!! இந்த பதிவை 'பார்க்கும் முன்' தற்செயலாக கிடைத்த புத்தகம், 'மௌப்பனி ரகசியப்பனி - சிவக்குமார் காலச்சுவடு'.....

அவர் குறிப்பிட்ட இளம் எழுத்தாளர்களில் செழியன், தமிழ்நதி, அஜயன்பாலா ... போன்ற மிக சிலரின் படைப்புகள் மட்டுமே அறிமுகம் உண்டு. வேறு சிலரின் பெயர்கள் 'சகி' மூலம் கேள்விப்பட்டதுண்டு. அதோட சரி!!



தென்றல் இதழில் முனைவர் வா செ குழந்தைசாமி அவர்களின் நேர்காணலையைப் படித்த பொழுதே ஒரு நெருடல் இருந்தது. அதையே கொத்ஸ் ஆரம்பித்து வைக்க (வழக்கம்போல) பலருடைய எண்ணச்சிதறல்கள்.

விரிவான கதைச்சுருக்கம் ரவிசங்கரின் பதிவில். ;)

ம்ம்ம்... என்னுடைய இரண்டனா...

விஜயகாந்த் இப்படி புள்ளி விவரங்களோட பேசியிருந்தா கைதட்டிட்டு 'வோட்டு(ம்)' போட்டுருக்காலாம்!!

தமிழ்ப் பற்று உள்ள... தமிழ் இணையப் பல்கலைகழகத்தின் தலைவருமான ஒருவரிடமிருந்து இப்படி ஒரு பதிலா என்பதுதான் ஆச்சரியமும், வருத்தமும். அதுவும் 12 வருடத்திற்குமுன் கிடைத்த (இருந்த) புள்ளிவிவரங்களை வைத்துக்கொண்டு பேசுவது அபத்தம்.

நவீன், இராமனாதன், அரை பிளேடு, தஞ்சாவூரான் இவர்களின் மறுமொழியும், வவ்வால், புருனோ, ரவிசங்கர் பதிவுகளும் மிக விரிவான விளக்கங்கள்.

இதற்குமேலும் தெளிவா சொல்லமுடியுமானு தெரியலை.

வேணும்னா ஒண்ணு பண்ணலாம்...

தமிழ் ஆசிரியர்கள், விரிவுரையாளர்களுக்கு இப்ப மற்ற துறையில கிடைக்கிறமாதிரி மாசத்துக்கு இலட்சம் (!) ரூபாய் சம்பளம் கிடைச்சா அப்ப 'போட்டி போட்டுக்கிட்டு' தமிழ் படிக்க வருவாங்களோ என்னமோ........ ?!



மதியின் திரைப்பார்வை மீது எனக்கு எப்பொழும் ஒரு சிறப்பு பார்வையுண்டு ;). அப்படி அறிமுகமான படம்தான், "Into The Wild" .

ஒரு சில படங்களை பார்த்துவிட்டு... (கொஞ்ச நாளைக்கு) வேற படங்கள் ஏதும் பார்க்கதோணாது. அந்தப் படத்தைப் பற்றிய சிந்தனைகளே வந்து செல்லும். அந்த வகையைச் சேர்ந்ததுதான் இதுவும்.

படத்தின் இயக்குநரான Sean Penn யை Mystic River மற்றும் சில தலைப்புச்செய்திகளின் மூலம் அறிமுகம் உண்டு. நடிப்பு, ஒளி ஓவியம், பாடல்கள், இசை என இரசிப்பதற்கு பல விசயங்கள் படத்தில் இருந்தாலும் படத்தின் வசனம்........ ம்ம்ம்.. இந்த நாவலை படிக்க வேண்டும் என்ற ஆவல் அதிகமாயுள்ளது.

ஜோதா அக்பர் (வரலாறு அல்ல)

* ஜோதா அக்பர்: ஓர் அழகான காதல் கதை. பல படங்களில் பார்த்ததுதான். இந்த காதலுக்கு இயக்குநர் வரலாற்று கதாபாத்திரங்களை எடுத்துள்ளார்.

* நம்ம இயக்குநருங்கனா... இரண்டு குடும்பம் - குடும்ப ஒத்துமைக்காக கல்யாணம் - வில்லன்கள் - காதலர்கள் பிரிவு, சோகம், சேர்க்கை - முடிவு 'சுபம்'. கிட்டதட்ட இதே மாதிரிதான் ஜோதா அக்பரும்...

* மொகலாய அரசர்களில் இந்தியாவில் பிறந்த முதல் அரசர் அக்பர் (1542 - 1605).

* அக்பருக்கு எழுத படிக்க தெரியாது.

* படத்தின் இயக்குநர் ஒரு பேட்டியில்... " இந்த படம் 20% வரலாறு; 80% கற்பனை"னு சொன்னதால ரொம்ப வரலாற பத்தி ஆரய தேவையில்லை.

* படத்தின் ஆரம்பத்தில் இருந்து அங்கங்கே ஒலிக்கும் அமிதாப் பச்சனின் (கம்பீர) வர்ணனை.

* படம் இரண்டாம் பானிபட் (1556) போருடன் ஆரம்பமாகிறது.

* படம் முழுவதும் ஜலால்தான். கடைசி சில காட்சிகளில்தான் 'அக்பர்' ஆகிறார்.

* ரித்திக் நடிப்பு அபாரம்; ஜஸ்வர்யா ராய் பச்சனுக்கு முகத்தில் எப்பவுமே ஒரு சோகம். வழக்கமான 'charm' missing...

* ரித்திக் நடிப்பை பார்க்கிறப்ப நம்ம விக்ரம் நினைவுதான் வருது.

* ரித்திக் - ஐஸ் chemistry ....ம்ம்ம்... நல்லாவே workout ஆயிருக்கு.

* ரகுமான் இசை (பின்னனி இசையும் A.R.ரகுமான்..!!) அசத்தல். சூஃபி பாடலும் இன்னும் இரண்டு பாடல்களும் அருமை. டிரம்ஸ்க்கு சிவமணி ... பின்னி எடுத்திக்காரு...

* விறு விறுப்பான இறுதி காட்சி இல்லனாலும்.... அந்த சண்டைக் காட்சி நல்லா எடுத்து இருக்காங்க.

* அம்மாவுக்கு நல்ல பிள்ளையா, தங்கைக்கு நல்ல அண்ணன்னா, மனைவிக்கு (ஜோதாக்கு மட்டும்தானோ?) நல்ல கணவனா, மக்களுக்கு நல்ல அரசனா இருந்த அக்பருக்கு, தன் பையன் சலீம் காதலை மட்டும் ஏத்துக்க முடியலை.. ஏன்..??

பி.கு: திரையங்களில் பார்க்கலாம்... இல்ல HD தொலைக்காட்சியில (52" !!) பார்க்கலாம். அப்பதான் அந்த கால இடங்களின் பிரம்மாண்டத்தையும், 'ஒளி ஓவியத்தை"யும், இசையும் இரசிக்கமுடியும்!!

ஜோதா அக்பர் & மொஹல்- இ- அசாம்

(ஐஷ்வர்யா ராய் பச்சன் புண்ணியத்தில்) வரலாற்றை 'கொஞ்சம்' நினைவுபடுத்திய வவ்வால், வாழ்க!!

[அவரின் பதிவில் பின்னூட்டமாய் போட்டது... இங்கே பதிவாய் ]

முகலாய வரலாறு பல ஆச்சரியங்களையும் பல கேள்விகளும் கொண்டது (பொதுவா வரலாறே இப்படிதானோ?).

"ஆனால் சலிமின் மனைவியை எப்படி இப்போ அக்பருக்கு மனைவியாக மாற்றினார்கள் என்பது தெரியவில்லை. இல்லை ஒரே பெயரில் இரண்டு பெண்கள் இருந்தார்கள் என்று எடுத்துக்கொள்வதா? "

ஒரே பெயரில் இரண்டு பெண்கள் இருந்தார்கள் என்றுதான் படித்ததாக நினைவு. இன்னும் அந்த சந்தேகமும், விவாதமும் நடந்துகொண்டுதான் இருக்கிறது.

1) அக்பரின் மனைவி ஜோதா பாய். இவர் ஆம்பரை சேர்ந்த ராஜபுத் இளவரசி. ராஜா பர்மல் (Raja Bharmal of Amber)ன் மகள்.

2)(சலிம்) ஜெஹான்கீர் மனைவி ஜோத் பாய் அல்லது ஜோத் பிபி (Jodhi Bibi ). இவர் ஜோத்பூர் ராஜபுதான அரசர் உதய் சிங்கின் மகள்.

ஜோதா பாய் அக்பருக்கு மூன்றாவது மனைவி. முதல் மனைவிக்கு குழந்தைகள் இல்லை. இரண்டாவது மனைவி சல்மா சுல்தான் - விதவை; பைராம்கானின் (Bairam Khan*) மனைவி. மூன்றாவதுதான் நம்ம ஐஷ்வர்யா பச்சன்..சே..ஜோதா பாய்.

இதுவரை....அக்பரின் மனைவிகளுக்கு பிறந்தவுடன் குழந்தைகள் இறந்துவிட "தவமாய் தவமிருந்து" பிறந்தவர்தான் (சலிம்) ஜெஹான்கீர். அக்பருக்கும் ஜோதா பாய்க்கும் 22 வயது (தான்!) வித்தியாசம். திருமணத்துக்குப் பின்னும் இந்து முறைப்படி வாழந்தார் ஜோதா பாய்.

இப்பொழுது .....

(சலிம்) ஜெஹான்கீர்க்கு பல மனைவிகள் இருந்தாலும் ஒரு நாலு பேர் முக்கியமானவர்கள்.
1.ராஜா பஹவான் தாஸ் என்ற ராஜபுதான அரசரின் மகள், மான் பாய் [அக்பரின் மனைவி, ஜோதா பாயின் அண்ணன் மகள்]
2. நூர்ஜகான் - அறிவும், அழகும் நிறைந்தவள். ஜெஹான்கீரோட one of the favourites!
3. ஜோத்பூர் ராஜபுதான அரசர் உதய் சிங்கின் மகள், இளவரசி மன்மதி என்ற பேகம் ஜோத் பாய் அல்லது ஜோத் பிபி (Jodhi Bibi ). - இவர்களுக்கு பிறந்தவர்தான் ஷாஜகான்.
4. அனார்கலி ** (வரலாற்றில் புகழ்பெற்ற காதல் ஜோடி, சலிம்-அனார்கலி).

இந்த கதையைவைத்துதான் "மொஹல்- இ- அசாம்" என்ற திரைப்படம். அனார்கலி கதாபாத்திரமே முகலாய வரலாற்றில் இல்லை என்ற கருத்தும் உண்டு!!!

1960களில் மிகப் பெரிய பொருட்செலவிலும் 'Box office'ல் ..... ஏன்.. 1975ல் ஷோலே (Sholay) வரும்வரை......பல சாதனைகளை நிகழ்த்திய காட்டிய கறுப்பு-வெள்ளை படம், மொஹல்- இ- அசாம்.

கதை: (சலிம்) ஜெஹான்கீர் (திலீப் குமார்)க்கும் அனார்கலி (அந்த காலத்து மதுபாலா) க்கும் உள்ள காதல்தான்.

** அனார்கலி முகலாய அரசில் இருக்கும் பல அடிமை பெண்ணில் ஒருவள். நடனமாடுவது அவருடைய தொழில்.(சலிம்) ஜெஹான்கீர்க்கு பார்த்தவுடன் அவளை பிடித்து விடுகிறது(!!).

அப்பா அக்பருக்கு பிடிக்கவில்லை. அனார்கலியை சிறையில் வைத்துவிடுகிறார்.

சலிமோ அனார்கலியை நினைத்து நினைத்து ஏங்குகிறார். (பட்டத்துக்கு வந்தபிறகுதான் ஜெஹான்கீர் ஆகிறார். அதுவரை சலிம்தான்). அனார்கலியும் சலிமை மற(று)க்க முடியவில்லை.

அக்பர் பார்த்தார்.... உயிருடன் 'புதைக்க' சொல்லி ஆணையிடுகிறார்.. அதுவும் மக்கள் கூடும் சந்தை போன்ற பொதுஇடத்தில், நாலு சுவர் எழுப்பி அதில் அனார்கலியை விட்டு விடுகின்றனர். அதிலேயே அனார்கலி இறந்து விடுகிறார்.

லாகூரில் அந்த இடத்தை 'அனார்கலி பஜார்' என்று அழைக்கிறார்களாம்.

அனார்கலி என்ற கதாபாத்திரமே உண்மையல்ல என்று ஒருபக்கமும்...
மறுபக்கம்.... அனார்கலி இறக்கவில்லை அங்கிருந்து தப்பிவிடுகிறார் என்றும் சொல்கிறார்கள்.

எது உண்மையோ.... வரலாற்றில் சலிம்-அனார்கலி காத(ல்)லர்களை மறக்க முடியாது.

அந்த படத்தில் இடம் பெற்ற திலிப் குமார் மற்றும் லதா மங்கேஷ்கர் தவிர இப்பொழுது யாரும் உயிடன் இல்லை.

இந்தப்படம் 2004ல் கலர்கூட வந்தது. படத்தில் சபையில் மதுபாலா ஆடும் பாடல், Pyar Kiya to Darna Kya (I have loved, so what is there to fear?) மிக பிரபலம்.

அருமையான நடனம்....இந்தி புரியலைனாலும் மறுமுறையும் கேட்க வைக்கும் பாடல்......








* பைராம் கான் - முகலாய வரலாற்றில் ஒரு முக்கியமான நபர்; குமாயுன் (Humayun)க்கும் அவருடைய மகன் அக்பரின் சபையில் இருந்தவர்.முதல் அமைச்சர். இரண்டாம் பானிபட் போரின் (1556) வெற்றிக்கு காரணமானவர் . (அந்த போர் நடந்தபொழுது அக்பருக்கு 13 வயது!). இவரைப்பற்றியே ஒரு தனி பதிவு போடமாமே!!

தப்புத் தாளங்கள்

'சிவாஜி' (நடிகர் திலகம் மன்னிப்பாராக!) படம் பார்த்தபின் 'சே...ரஜினி படம்லாம் முதல் ஆளா போய் பார்த்து இருக்கோம்.... செமஸ்டருக்கு முந்தின நாள் தளபதி பார்த்தது...நண்பனிடம் தலைவர் படம்தான் சூப்பர்னு சண்டை போட்டது....இப்ப என்னடான... 'சிவாஜி'யை 'சினிமா'தானகிற ஒரு கண்ணோட்டத்தில பார்க்கமுடியாம பெரிய இவன்கினக்கா கேள்விலாம் கேட்கதோணுதே...?!'

என்னுடைய பள்ளிகூடம் அல்லது கல்லூரி காலகட்டத்தில 'சிவாஜி' வந்திருந்தா பிடிச்சிருக்குமோ..என்னவவோ...?!!

நல்ல படம்னா அப்பாவே காசுகுடுத்து பார்த்துட்டு வரச்சொன்னாலும்...அப்பாவுக்கு தெரியாம முதலும் கடைசியுமாய் பார்த்த படம்: 'போக்கிரி ராஜா'! (தலைப்பு....அதுவா அப்படி அமைச்சிருச்சோ..?!)

ம்ம்ம்...ரஜினி படங்கள்ல எனக்கு பிடித்த ஒரு பத்து படங்கள் அப்படினு பட்டியல் போட்டால்.... உடனே நினைவில் வந்ததில்..

1. 16 வயதினிலே
2. முள்ளும் மலரும்
3. ஜானி
4. நினைத்தாலே இனிக்கும்
5. தில்லு முல்லு
6. அன்புள்ள ரஜினிகாந்த்
7. நல்லவனுக்கு நல்லவன்
8. தளபதி
9. அண்ணாமலை
10. பாட்ஷா

பார்க்கணும் நினைக்கிற ரஜினி பட(ம்)ங்கள்: 'தப்புத் தாளங்கள்' & 'அவள் அப்படிதான்'

மணிச்சித்திரதாழ் - அப்தமித்ரா - சந்திரமுகி - பூல் புலயா

மணிச்சித்திரதாழ் 14 வருடத்திற்கு முன் வந்த படம். கேரளாவில் 600 நாட்கள் ஓடியது...

பாசில், மோகன்லால், ஷோபனா, நெடுமுடி வேணு, திலகன், இன்னோசண்ட், KPAC லலிதா [மறைந்த இயக்குநர் பரதனின் மனைவி (தேவர் மகன், ஆவாரம் பூ) ] .....இப்படி திறமையான நடிகர்கள்....நடிகைகள்...

வித்தியாசமான கதை...அதற்கு சொந்தக்காரர் மது முட்டம் .... திரையில் தெளிவாக கொண்டு சென்றது பாசிலின் இயக்கம்.....

ஷோபனாவின் நடனம், நடிப்பு.... (தேசிய விருது வாங்கி கொடுத்தது)

மோகன்லாலின் காமெடி...

நெடுமுடி வேணு, திலகன், KPAC லலிதா, இன்னோசண்ட் ... இவ்ர்களின் நடிப்பைப்பற்றி எதுவும் சொல்லதேவையில்லை... அருமையான கலைஞர்கள்!
இதை பி.வாசு அப்தமித்ரா, சந்திரமுகி என்று கன்னடத்திலும், தமிழ்/தெலுங்கிலும் எடுத்து வெற்றி படங்களாக்கியவர்...

அப்தமித்ரா .. படம் பார்க்கவில்லை...அதனால் சொல்றதுக்கு ஒன்றுமில்லை...

சந்திரமுகி ... சூப்பர் ஸ்டார் படம் .... சும்மா வந்தாலே படம் 100 நாட்கள் ஓடும்..(ஜப்பானிலும்..). அவருக்கு இப்படி ஒரு அழுத்தமான கதை தேவையில்லைதான்...ஆனால், சந்திரமுகியின் இறுதிக்காட்சி பார்த்துட்டு 'என்ன கொடுமையிது சரவணா?' என்றுதான் தோன்றியது...

மணிச்சித்திரதாழின் கதையே அந்த இறுதிக்காட்சிகள்தான்.

அதையே தமிழில் எடுக்கும்போது அப்படியே எடுக்கவேண்டியதுதானே...அந்த கதையை 'சிதைத்த' பெருமை பி.வாசுவுக்கும், சூப்பர் ஸ்டார் (??) க்குமே! ம்ம்ம்..அது சரி...சின்னதம்பி எடுத்த உங்ககிட்ட அதுக்குமேல 'எதிர்பார்க்கிறதும்' தப்புதான்!!

இப்பொழுது அந்த படத்தை இந்தியில் பிரியதர்ஷன் பூல் புலயா (Bhool Bhulaiyaa) ஆக வெளிவந்துள்ளது...

பிரியதர்ஷன்.. மணிச்சித்திரதாழின் உதவி இயக்குநரில் ஒருவர்.... தமிழில் 'சிறைச்சாலை' தவிர இவர் நல்லதொரு படம் எடுக்கவில்லை... ஆனால், மலையாளத்தில் பல வெள்ளி விழா படங்கள் கொடுத்தவர்.... உதாரணத்திற்கு.... போயிங் போயிங், தாளவட்டம், சித்திரம், வந்தனம்,கிலுக்கம்..
அதுவும் (கல்லூரியிலிருந்தே நண்பரான) மோகன்லாலுடன் கூட்டணி என்றால்.....'அல்வா' சாப்பிடுவதுபோல...

ஷோபனா....செளந்தர்யா..ஜோதிகா வரிசையில் வித்யா பாலன்

மோகன்லால்...விஷ்ணுவர்த்தன்..ரஜினிகாந்த்..அக்சய குமார்

சுரேஷ் கோபி..ரமேஷ் அரவிந்த்...பிரபு.. சினய் அகுஜா

வினயா...பிரேமா...நயந்தாரா..அமிஷா படேல்


'பூல் புலயா'வில் இறுதிக்காட்சி எப்படியோ?

புது வசந்தம்

இந்தப் படம் வந்தப்ப, கல்லூரியில் அடியெடுத்து வைத்த நேரம். விக்கிரமனின் முதல் படம்கூட. படம் பார்த்துவிட்டு வந்து விக்கிரமனின் இரசிகன் ஆயிட்டதாகூட சொல்லலாம். அந்தப் படத்தின் சுவரொட்டிகளில் இருக்கும் வசனங்களையெல்லாம் டைரியில் எழுதி வைத்திருந்த காலம்...

அப்படி அந்த படத்தில் எனக்கு என்ன பிடிச்சது.... புது இயக்குநர் என்பதலாயா, படம் எடுத்த விதமா, கதையா, நட்பா - காதலானு கதாநாயாகி பேசும் இறுதிகாட்சியின் வசனங்களா.... தெரியலை.. இப்படி விக்கிரமனின் "எல்லா" படங்களையெல்லாம் பார்த்தவன்... 'பூவே உனக்காக' வரை...[அப்ப இதுக்கு முன்னாடி அவர் எடுத்த படம்லாம் நல்லாருக்குகிறியானுலாம் கேக்காதீங்க...;) ] அப்பொழுது அந்தப் படத்தை பார்த்த பொழுது எனக்கு ஏற்பட்ட சில எண்ணங்கள் நந்தாவுக்கும் ..... அதில் வந்த மறு மொழிகளையும் படித்து விட்டு கொஞ்சம் நேரம் சிரிச்சேன்கிறது உண்மைதான்.

ஒரேமாதிரியான கதை களம், 'லலலல ....லாலா...' னு வருகிற பின்னனி இசை - முக்கியமா கதாநாயாகன் பேசுறப்ப, குமுதம், ஆ.வி ல வந்த காமெடி துணுக்குகள்னு ரொம்பவே அழுத்துப் போனது. அகத்தியன், சேரன், அமீர் போன்ற இயக்குநர்களின் வரிசையில் வர வேண்டியவ்ர்... .இன்னும் அதே 'புது வசந்தம்' நிலையில் இருக்கிறாரோ என்ற எண்ணமும் உண்டு.

சில வருடங்களுக்கு முன்பு, 'விக்கிரமனின் இரசிகன் ' கதையை என் மனைவிடம் சொல்ல இன்றுவரை ஒவ்வொரு முறையும் விக்கிரமன் படம் வரும்பொழுது... என்னை செய்யும் கிண்டலில் இருந்து 'தப்பிக்க' வழி தேடி கொண்டிருக்கிறேன்.

ஆனால் ஒன்னு மட்டும் உண்மை... 'சின்னத்தம்பி' பி.வாசு, 'சிவகாசி' பேரரசு போன்ற இயக்குநர்கள் மாதிரி கலாச்சார சீரழிவு அவர் படங்களில் இல்லை. அந்த வகையில் மட்டும் இப்பொழுது எனக்கு விக்கிரமன் OK.

இப்பொழுதலாம் தொலைக்காட்சியில் விக்கிரமன் படம் வந்தாகூட பார்க்கிறதில்லை.... 'புது வசந்தம்' மட்டும் விதிவிலக்கு......